Зусім няшмат часу аддзяляе адзін ад аднаго пераможныя святы. Толькі што мы адзначылі юбілей Вялікай Перамогі, і вось зноў сабраліся, каб ушанаваць памяць загінуўшых за гэту перамогу, каб аддаць даніну павагі, зноў і зноў падзякаваць ветэранам Вялікай Айчыннай вайны. Бо менавіта іх перамога стала
падставай для галоўнага свята нашай краіны – Дня Незалежнасці Рэспублікі Беларусь.
Свабоду і мір сваёй краіны, а па вялікім рахунку і ўсяго свету, адстаяла Чырвоная Армія, увесь савецкі народ.
Гітлераўская акупацыя, якая працягвалася тры гады на нашай зямлі, была з’явай асаблівага роду, гаварыў у прывітальным слове да бярэзінцаў на мітынгу ў гонар свята выконваючы абавязкі старшыні райвыканкама Я.М. Круковіч. – Нямецкія захопнікі хацелі знішчыць беларускі народ. Ім удалося захапіць нашу зямлю, але не ўдалося галоўнае – скарыць і зняволіць наш народ. Беларусь аддала дзеля абароны Айчыны кожнага трэцяга, лепшых сыноў і дачок. Лёс кожнай беларускай сям’і абпалены вайной, і памяць пра яе да гэтага часу адгукаецца болем.
У той вайне, як адзначаў Я.М. Круковіч, загінулі тысячы жыхароў нашага раёна. Загінулі на франтах і ў партызанскай барацьбе, былі пазверску закатаваны фашыстамі. І мы заўсёды будзем памятаць імёны і подзвігі загінуўшых, якія для нас, будучых пакаленняў, з’яўляюцца маяком у тым, як патрэбна любіць сваю зямлю. Дасягненні бярэзінцаў у працы павінны стаць лепшай памяццю.
На жаль, кожны год мы губляем ветэранаў Вялікай Айчыннай вайны.
І пасля мы будзем адзначаць гэта свята, свята вызвалення Беларусі ад нямецкафашысцкіх захопнікаў, але яно не будзе такім урачыстым, падкрэсліваў у сваім выступленні на мітынгу старшыня раённага савета ветэранаў М.С. Абазовік. – На жаль, адыходзіць пакаленне, якое складае залаты фонд нашай дзяржавы.
Мікалай Савельевіч, як прадстаўнік старэйшага пакалення, які памятае вайну і ведае што гэта такое, выказаў занепакоенасць тым, што робіцца побач з Беларуссю, ва ўсім свеце, дзе да гэтага часу ад куль, снарадаў, мін гінуць людзі, паміраюць на вайне.
Таму наша задача – захаваць памяць пра Вялікую Айчынную вайну, падкрэсліваў ён. – Шмат робіцца ў гэтым плане па лініі раённага Савета ветэранаў. За апошні час у раёне выдадзена пяць брашур, у якіх раскрываецца праўда аб вайне, баявы шлях тых, хто прайшоў вайну. Мы, старэйшае пакаленне, заклікаем маладых не здраджваць сваёй Радзіме, рабіць усё магчымае дзеля яе захавання.
Ад імя малодшага пакалення слова было прадастаўлена дыпламанту конкурсу “Добры дзень, мір!”, вучаніцы Бярэзінскай гімназіі Дар’і Круталевіч. Яна падзякавала ветэранам за чыстае неба над галавой, за магчымасць жыць, вучыцца і працаваць і запэўніла, што подзвіг ветэранаў Вялікай Айчыннай вайны застанецца ў сэрцах і справах будучых пакаленняў.
Усе ветэраны, якія па стане здароўя змаглі прысутнічаць на свяце, як заўсёды, былі і застаюцца яго галоўнымі ўдзельнікамі. Ім галоўныя словы падзякі, ушанаванне і паклон ад усіх пакаленняў. Падзяка загінуўшым, усім тым, чые жыцці забрала вайна, у хвіліне маўчання, у кветках і вянках, якія кладуцца да помніка загінуўшым воінам і партызанам ад раённага выканаўчага камітэта і раённага Савета дэпутатаў, ад працоўных калектываў, грамадскіх арганізацый, ветэранаў раёна.
Як заўсёды, многія пасля заканчэння мітынгу не спяшаюцца пакідаць месца яго правядзення. І зноў кладуцца кветкі да помніка ў скверы ад тых, чыя сямейная памяць нязменна звязана з памяццю пра Вялікую Айчынную вайну. Зноў і зноў прадстаўнікі розных пакаленняў становяцца да помніка, каб захаваць у дамашніх архівах фотаздымкі. У гэтым ёсць і тое асабістае, што складае ў адно нязгасную народную памяць.
Але свята ёсць свята, тым больш самае галоўнае. Таму без песень і танцаў, забаў тут ніяк нельга. На гарадскім стадыёне працягвалася святкаванне, дзе можна было стаць гледачом канцэртназабаўляльнай праграмы, або паўдзельнічаць у спартыўных спаборніцтвах, наведаць выставу народнай творчасці, а заадно і набыць упадабаную рэч бярэзінскіх майстроў, паласавацца шашлыком і іншымі прысмакамі, парадаваць дзяцей гэтымі самымі прысмакамі і забавамі на гульнёвых атракцыёнах.
Увечары святкаванне прадоўжыла дыскатэка на гарадской плошчы. Роўна ў 23 гадзіны яна была перапынена агульнарэспубліканскай акцыяй “Спяём гімн разам”. Акцыя, разам з памяццю пра мінулае, стала сведчаннем нацыянальнай згуртаванасці ўсіх беларусаў.
Ала АЛЬФЕР.
Фота Алены ГРОМАВАЙ.