На свяце-конкурсе разьбяроў былі жартаўлівыя скульптуры Леніна
МЯДЗЕЛ, Aўтар: Алесь ВЫСОЦКІ, 23.05.2013. 15:55
У суботу, 18 мая, у Мядзеле прайшло шостае
рэгіянальнае свята-конкурс разьбяроў па дрэве "Разьбы зачараванне”.
Удзельнічалі ў ім 26 майстроў. Тры гады таму, калі Мядзел таксама прымаў
падобнае свята, іх было больш – 34.
Прыехалі разьбяры з Чэрвеньскага,
Стаўбцоўскага, Бярэзінскага раёнаў. З нашага рэгіёна былі майстры з
Валожынскага раёна і Мядзельскага (к.п. Нарач (Купа) і Крывічоў). Сярод
удзельнікаў былі і дасведчаныя творцы, і юныя таленты.
Размясціліся майстры са сваімі вырабамі ў цэнтры горада – на плошчы
Шаранговіча. І кожны ахвотны мог убачыць, якія дзівосы можна ствараць з
дрэва: ад маленькіх і простых рэчаў да вялізных пано.
Вось
Яўген Осіпаў з Беразіно другі раз на свяце ў Мядзеле. Прывёз
разнастайныя вырабы: тут і лыжкі – адметныя, з цікавымі надпісамі, і
прыгожыя скульптуры. Многія звярталі ўвагу на яго скульптуры з выявай
Леніна – правадыру майстар прысвяціў некалькі прац, у тым ліку і
жартаўлівых.
Майстры не толькі прадстаўлялі свае работы: прайшоў конкурс на
хуткасць і якасць выканання твору. На яго выраб адводзіліся тры гадзіны.
– У конкурсе ўдзельнічаюць чатыры нашы прадстаўнікі, – кажа дырэктар Крывіцкага цэнтра народных рамёстваў Уладзімір Хіхіч. – Гэта майстры Генадзь Скурко і Уладзімір Гаранін і гурткоўцы Віталь Лётка і Яўген Зянько.
– Разьбой цікава займацца, і рэчы прыгожыя можна зрабіць. А ў конкурсе такім прыемна паўдзельнічаць, – кажа Яўген Зянько.
– Тут столькі ўсяго прыгожага прывезлі, якія карціны з дрэва! – не хавае захаплення Віталь Лётка.
Вырашыў прыняць удзел у конкурсе і Вячаслаў Броска з к. п. Нарач (Купа).
– Проста люблю ўсё з дрэва рабіць, – дзеліцца ён.
Валожынскі раён прадстаўлялі гурткоўцы Дорскага філіяла Івянецкай школы мастацтваў. Пазнаць юных майстроў Сяргея Пупко, Вадзіма Ганчарыка, Сямёна Новіка было лёгка – працавалі яны ў нацыянальных строях. А дапамагаў ім парадай выкладчык Сяргей Мурашоў.
Пасля завяршэння конкурсу журы падвяло вынікі. Лепшых вызначылі ў
дзесяці намінацыях. У кожнай былі лаўрэаты і прызёры. А створаныя падчас
свята вырабы застануцца на Мядзельшчыне – у Крывіцкім цэнтры народных
рамёстваў.
Алесь ВЫСОЦКІ.
Фота Алеся ВЫСОЦКАГА.
|